Урсай

Соңгы елларда демографиянең кискенләшүе югары уку йортларына абитуриентларны җәлеп итү юлларын үзләренә эзләргә калдырды. Алар өчен рәхәт заманалар бетте: республика район һәм шәһәрләре мәктәпләренә чыгып, вузның үзенчә­лекләре турында сөйлисеңме, әллә интернет аша аралашуны җайга саласыңмы – монысы инде вузларның үзлә­реннән тора. Узган ел югары уку йортлары кабул ­итү буенча дәүләт планын тиешенчә үтәгән иде. ­Быел хәлләр ничегрәк ­булыр икән?

Татарстан мәктәпләрен бы­ел 23,9 мең укучы тәмамласа, вузларда исә 36 меңнән артык урын бар. Моннан тыш техникум, көллиятләр дә үз студентларын көтә. Шулай ук башка төбәкләрдәге вузлар да безнекеләргә өметләнми түгелдер. Кыскасы, абитуриентларны “ау­ларга” теләү­челәр күп. Шушы көннәрдә башкалабызда оештырылган “Мәгариф. Карьера” күргәзмәсендә дә белем бирү уч­реҗдениеләренә мәктәп укучыларында төрле һөнәрләргә кызыксыну уяту мөмкинлеге тудырылган иде. ТР хезмәт, халыкны эш белән тәэмин итү һәм социаль яклау министры вазыйфаларын башкарган Айрат Шәфигуллин­ның: “Бу күргәзмә ил икътисадый кризис кичергәндә, Татарстанда эшсезлек хакимлек ит­кәндә уз­дырыла. Һәм нәкъ менә шушы чорда нәрсәгә һәм ничек өй­рәнергә кирәклеге ачык кү­ре­нә дә инде”, – дигән сүзләре яшьләргә дөрес тәэ­сир иткәндер. Аңлаган булсалар, барлык абитуриентларның да югары белем дип ис­ләре китмәс, һөнәр сайларга теләү­челәр дә артыр, бәлкем. Шул ук вакытта Айрат Радинович киләчәктә тар белгечлек­ләр популяр булачагын да белдерде. Бу очракта вузлар­ның “баш авыртуы” артырга мөмкин. Әмма ничек кенә булмасын, университетларның ка­бул итү комиссияләре кәеф­ләрен төшермиләр.

– Без күңелне төшермибез. Республикада барлыгы 31 мең­ләп кеше бердәм дәүләт имтиханнарын тапшырырга җыена, шулай булгач, үз абитуриентларыбызны табарбыз дип ышанабыз. Үткән ел 8 мең абитуриенттан 20 меңләп гариза кабул ителгән иде. Барлыгы 2 меңләп егет-кызны кабул иттек. Контроль сан 1300 иде, без аны БДБ, Ерак Көнчыгыш, илнең башка төбәкләреннән килүчеләр бәра­бәренә арттырып үтәдек. КДУ федераль университет ( хәзер аның яңа исеме – Казан (Идел буе) федераль университеты) булгач, Россия төбәкләреннән килүчеләр саны тагын да артыр дип өметләнәбез”, – ди кабул итү комиссиясенең җавап­лы сәркатибе Сергей Ионенко.

Бу эшкә уку йортының яңа ректорына җиң сызганып тотынырга туры киләчәк.

Инде хәбәр иткәне­безчә, Новосибирскида узган ки­ңәшмәдә РФ Премьер-ми­ни­стры Владимир Путин Архангельский, Екатеринбург, Казан, Якутия, Владивостокта оешты­рылачак федераль университетларның ректор­ла­ры­­ исемен атады. Шулай итеп, Казан дәүләт университеты базасында оештырылачак Казан (Идел буе) федераль универ­ситеты ректоры вазыйфасына Алабуга мэры Илшат Гафуров билгеләп куелды. Илшат Гафуров үзе дә шушы универ­ситетның физика факультетын тәмамлаган. Инглиз телен яхшы белә. Физика буенча кандидатлык эшен яклаган. Үзен квалификацияле икътисадчы булып таныткан Илшат Гафуров Казан дәүләт финанс-икътисад институтында икенче югары белем алган, икътисад темасы буенча докторлык диссертациясен язган шәхес. Аның хезмәт еллары шактый үзенчә­лекле. Алабуга педагогика университетында – мө­галлим, “Зилант” төбәк хуҗалыкара ассо­циациясендә – генераль директор, ТР Дәүләт Советы­ның икътисад үсеше һәм реформалары буенча даими ко­миссиясендә рәис урынбасары вазыйфаларын билә­гән Илшат Рәфкатович 1998 елда Алабуга шәһә­ре мэры итеп билгеләнә. Шушы еллар эчендә ул таркау, пычрак һәм икен­че пландагы шәһәрне бөтенләй яңа дәрә­җәгә күтә­рә. Университетның исеме һәм яңа билгеләнгән ректор­ның гыйльми мохиттән булмавы уңаеннан матбугатта каршылыклы фикерләр әйтелә. Профессор Миркасыйм Госманов Россиядә, югары уку йортлары ректорларын, Пре­зидентның округлардагы вә­килләрен һәм башка җавап­лы вазифаи затларны сайлап куймау юлыннан бару дөрес фал түгел дип саный. ТР Фәннәр академиясенең Тарих институты директоры Рафаэль Хә­кимов Илшат Гафуровны Ала­буганың меңьеллыгы уңаен­нан үзен белемле менеджер итеп күрсәтте дип исәпли һәм аңа яңа эшчәнлегендә һәрь­яклап ярдәм кирәклеген әйтә. Ә университет галимнә­ренең яңа җитәкчегә каршылык күрсәтүен бу уку йортында күптәннән килә торган традиция белән аңлата.

//СӘРИЯ САДРИСЛАМОВА//